PENGANGENKU

Iki nuswantara wus merdika

uwal saka pangregeming liya bangsa

nanging aja salah tampa

yen merdika iku amung bisa madeg negara tanpa panggawening liyan praja

aja salah pilah yenta iki padha gumregah

malik dadi penjajah ngarah bandha kepara njarah,

rebut pangkat-drajat-lan semat dimen dadi pejabat

tundhone mung kanggo mikirake brayat

dene rakyat tansaya mlarat lan kesrakat

crita perang kanggo adeging nuswantara

wis malik dadi crita perang kanggo adeging nayaka

adol warta mring warga bakal ngupakara bangsa

njejegake negara saka sakehing panggodha

ngentasake kawula mrih mulya

titi tentrem tata raharja

ah…gombal mukiya….

iku tangeh lamun kalakyan

uger maksih ngumbar kamurkan

tan nggagas uriping liyan

iki pancen gurit sengit

ngigit-igit mring pawongan kang nembe ngerit dhuwit

sandhuwuring tangis pating jlerit

ngampet rasa kahananing urip

nyawang lintang njlarit

ngangen-angen owahing nasib

ora beda jaman nalika urip satengahing penjajahan

iki swara cilik kang kagurit ing dluwang

ora kudu nglurug papan kanggo padu

yen mung tundhone dadi balang-balangan

kepara adu atosing balung uleting kulit mring dhuwuran

satemah rakyat mung kanggo bal-balan

dadi korban ing suwaliking pranatan

muga isih ana kawicaksanan

kanggo mapag gegayuhan

tan lali marang pahlawan pejuang

kang nglawan penjajah nggadhang kamardikan

soroh jiwa raga kanggo mulyaning bumi nuswantar